"Абай әлемі" - қазақ әдебиетінің асыл діңгегі

27 қараша күні Абай атындағы Қазақ ұлттық педагогикалық университетінде рухани мазмұны терең, тағылымы мол «Абай күні» атты саяхат- сабағы өткізілді. Академик С.Қирабаев атындағы қазақ әдебиеті және оқыту әдістемесі кафедрасының мектептермен байланысты нығайтуға бағытталған бұл шара – білім мен парасаттың тоғысқан мерекесі десе болады. Хакім Абайдың 180 жылдық мерейтойы аясында өткен мазмұнды іс-шараға Алматы қаласы, Алатау ауданы №178 мамандандырылған лицейдің қазақ тілі мен әдебиеті пәнінің мұғалімі Тілеужан  Әбілқайыр Егізбайұлы  және лицей оқушылары қатысты.

Еліміздегі тұңғыш жоғары оқу орны – қасиетті қарашаңырақ ҚазҰПУ-дың тарихы, оның қабырғасында қызмет еткен ұлт руханиятының қайраткерлері туралы тағылымды мәліметтер берілді. «Абай» музей-кабинетінде оқушыларға хакім Абайдың өмір жолы, кемеңгерлік ойлары мен шығармашылық мұрасы жөнінде танымдық дәріс өткізіліп, оқушылардың көкейіндегі сауалдарына жауаптар берілді.

Саяхат-сабағы соңында қатысушылар тарихи шаңырақта түскен естелік фотосуреттермен әсерлі сәттерді бекемдей түсті. Мұндай тағылымды шаралар алдағы уақытта да өз жалғасын табатынына сеніміміз мол.